Speaker wa mbuunge ya kibururi Justin Muturi aregerereria ati ni undu muritu Commission ya ithuurano na mihaka (IEBC) gwikithia referendum mbere ya githuurano kinene kia mwaka uyu ungi wa 2022.
Muturi augiite ati IEBC ndiri na kahiinda kaiganu ga gwikithia githuurano kinene kia mwaka wa 2022 oro undu umwe na referendum ya nditi ya BBI.
Ahithuriitie ati mbuunge yahitukirie Bill ya ugaruri wa gatiba ya mwaka wa 2020 kahiinda kaniini tu mbere ya igooti rinene gutua ciira wa BBI no bill iyo ndianeyaniitwo kuri president niguo amikire kirore.
Muturi augiite ati gacuunji ka 257 ga gatiba ni gataariirie makinya ma guthingatwo mbere ya referendum gukinyirirwo thuutha wa Bill iyo gwikirwo kirore ni president.
Miario iyo ya Muturi yahota kumenererio ni anyiiti mbaru a mihang’o ya BBI aria marerutaniria uria woothe mahota gutigirira gatiba ni yagarurwo mbere ya githuurano kinene kia mwaka wa 2022.