COVID-19: Watu 302 zaidi waambukizwa huku wagonjwa 17 wakifariki

Kenya imeripoti visa 302 vya maambukizi ya COVID-19 kutokana na upimaji wa sampuli 3,038 katika muda wa masaa 24 yaliyopita.

Jumla ya visa sasa vimefika 83,618 na jumla ya sampuli zilizofanyiwa uchunguzi kufikia sasa ni 888,971.

Visa hivyo vipya vinajumuisha Wakenya 286 na raia wa kigeni 191 ambapo 191 kati yao ni wanaume na 111 ni wanawake, kati ya umri wa mwaka mmoja hadi miaka 83.

Wagonjwa 369 wamepona leo kutokana na ugonjwa huo, 287 kutoka kwa mpango wa kuhudumiwa nyumbani na 82 kutoka hospitalini. Jumla ya waliopona humu nchini imefikia 55,344.

Also Read
COVID-19: Wizara ya Afya yatangaza visa vipya 382 kutoka kwa sampuli 3,719

Wagonjwa 17 pia wamethibitishwa kuaga dunia na kuifanya idadi ya maafa humu nchini kufikia 1,469.

Kulingana na Waziri wa Afya Mutahi Kagwe, jumla ya wagonjwa 1,282 wanapokea matibabu katika vituo mbali mbali vya afya kote nchini huku 8,405 wakihudumiwa nyumbani.

Wagonjwa 72 wako kwenye vyumba vya wagonjwa mahututi, 47 wakiwa kwenye vifaa vya kusaidia kupumua na 23 wanapokea hewa ya ziada ya Oksijeni.

Also Read
Chama cha Ekeza chawafidia wanachama wake pesa walizowekeza

Wakati uo huo, mkutano wa kamati ya kitaifa ya kukabiliana na ugonjwa wa COVID-19 ulioongozwa na Rais Uhuru Kenyatta umetoa pendekezo kwamba majukumu ya kamati hiyo yapanuliwe hadi katika maswala ya kutafuta chanjo dhidi ya ugonjwa huo.

Kwenye mkutano huo, kamati hiyo imepewa ripoti kutoka Shirika la KEMRI-Wellcome Trust, kuhusu utafiti unaoendelea kwa ushirikiano kati ya shirika hilo, Astra-Zeneca na Chuo Kikuu cha Oxford.

Also Read
Kenya yanakili visa 244 vipya vya covid-19, watu wawili zaidi waaga dunia

Kenya, kupitia kwa shirika hilo la utafiti, ni mojawapo kati ya nchi saba duniani zinazoshiriki katika utafiti wa Astra-Zeneca na Chuo Kikuu cha Oxford, wa kutengeneza chanjo dhidi ya COVID-19.

Waziri Kagwe amefichua kwamba jumla ya watu 60,000 wamejitolea kushiriki katika majaribio ya chanjo hiyo kabla mwisho wa mwaka huu.

“Huku KEMRI ikiendelea kushirikiana na Astra-Zeneca na Chuo Kikuu cha Oxford kwenye majaribio ya chanjo hii, serikali inaendelea kutafuta ushirikiano katika nafasi zenginezo,” akasema Kagwe.

  

Latest posts

Uhaba wa maji wakumba kaunti ndogo ya Lagdera baada ya kukauka kwa vidimbwi

Tom Mathinji

Magoha: Serikali haitabatilisha agizo lake kuhusu utumiaji wa mabasi ya shule.

Tom Mathinji

Kenya yapokea zaidi ya dozi 400,000 za chanjo ya Astrazeneca kutoka Uingereza

Tom Mathinji

Tovuti hii inatumia kuki kukuhudumia vyema. Tafadhali kubali kupokea. Kubali Fahamu Zaidi